何爸+何媽=何登+何叮@何家

何登終於同"小學雞"一詞聯結上, 意味住幼稚園生活O既結束, 小學生涯O既開始!~

唔知係咪何家O既宿命, 每次何家由一個階段進入另一個階段, 總係會換一個工人姐姐, 連埋今次, 何家已經第6次換工人啦!~計下時間, 可能到何叮做小學雞O既時候, 何家又會再黎一個新工人姐姐。唉!~

何登升小學, 何家又黎一次秩序重整。以前何媽每日會送兩個小朋友返學, 然後返工。而家, 何媽要一早起身, 送何登去搭校巴, 然後提早一個鐘返工。至於何叮, 因為唔想佢太早起身, 所以只能交由工人姐姐接送。就依個安排, 何媽都擔心過何叮會唔會唔開心, 所以事前都同何叮傾過, 何媽話俾何叮知, 媽媽早一個鐘頭返工, 就可以早一個鐘頭返屋企陪佢, 何叮一口答應! 到目前唯止, 都算進行得唔錯, 只係工人姐姐仲未掌握到叫何叮起身O既方法, 所以何叮有時都會遲到... ...@,@

何登開學第一日, 同學投票選左佢做班長, 佢好開心, 開心到放左學都要返幼稚園同老師講, 哈哈, 睇黎何登當左幼稚園係佢娘家。

尋晚, 何登又話俾何媽知, 佢又被選左做"DD科長", 何媽問佢咩係"DD科長", 佢話即係其他科科長, 咁咩係"DD" 呢? 佢又解釋唔到! @,@

依家開左學幾日, 佢話返小學開心, 不過都係返幼稚園開心D。可能係佢仲未識到新朋友, 而且小學生活又的確無幼稚園咁多活動, 所以何媽只好多D同佢傾下計, 鼓勵佢主動識D新朋友, 同埋叫佢接妹妹放學O既時候, 返幼稚園同老師分享下佢O既小學逸事。希望幫佢慢慢過渡依個轉變期。

今日, 何媽同何登排隊等校巴O既時候, 何登真係開始嘗試去識朋友, 雖然佢用O既方法有少少笨, 但係何媽看到眼裡, 真係好欣賞佢O既勇氣, 同佢面上O既笑容! 登登, 加油呀!

何叮今年都升左K2, 佢好開心, 以佢O既容易, 應該係: 超開心! 因為佢話自己做左大姐姐, 要幫手照顧好多新入學O既小朋友。何叮話尋日老師派餅仔, 唔夠分, 有D同學無, 所以佢將老師送俾佢O既巴斯光年送左俾個位無餅食O既同學仔。何媽問佢, 咁點解你唔係將自己D餅送俾同學仔食, 而係送左個玩具俾同學仔O既? 何叮話: 我鐘意食野, 多過鐘意玩具, 最緊要有野食! @,@......小朋友O既價值觀就係咁直接! 哈哈! 為人父母者, 千祈唔好用自己O既價值觀強套係小朋友身上!

回望四年前幫何登搵幼稚園O既時間, 何媽好興幸係全無鋪排O既情況下, 幫兩兄妹搵到一間咁好O既學校。學舍雖然細, 但係學O既校長同老師真係以"愛與自由"俾小朋友寬廣O既成長同學習空間。何登同何叮依家都識得尋根究底咁提問一D佢地有疑問O既事, 例如: 何登尋曰問: 依家小學日日都講天主 , 講耶穌O既事, 咁究竟係咪真係有依個人, 係咪真係有個D事發過架? 且勿論答案係乜野, 何媽欣喜O既係, 佢會有思想地提問, 而唔係盲目地信從! 依D都係有賴幼稚園老師鼓勵小朋友以多角度思考方式去學習, 而唔係用一個"單向灌輸"O既方式去教學。

黎到小學, 何媽暫時都覺得無選錯校, 至少, 開學日, 有兩位黑衣校長!